التشارجر الزرقاء
انا قاعد في الدوام و انطر كل دقيقة تطوف و تصير الساعة 3 عشان اروح بيتنا و اشوف علاوي ولد اختي اليديد, موديل 2010.
طبعا مثل ما تدرون ان اللي ينطر الوقت يطوف يحسب كل ثانية و الوقت ما يطوف, في المقابل انا قررت اكتب جم شغلة صارت معاي.
سيارتي العزيزة قرر تكييفها يخترب في عز الصيف و الحر فـ قطيتها القراج و طلع الكمبرسر خربان, فـ عشان جذي يصير تكييفها حار وايد. المهم قال انها راح تخلص اليوم اللي بعده يعني مو بنفس اليوم و انا عندي دوام … قبل لا اقط السيارة عند القراج سألت اخوي شنو ممكن يكون حل ؟ يقطني مثلا ؟ او اقطه مثلا ؟ جان نقرر نروح محل تأجير السيارات و أجرنا سيارة لـ يومين على ما تخلص حبيبتي من القراج
(اي … سيارتي حبيبتي 
) و أخذت لي دووج تشارجر ( مع العلم اني مو رفيج السيارات الأمريكية ) بس هذا كان احسن شي عندهم لأن الباجي كله سيارات كورية غبية اول مرة اسمع بإسمها. عاد جنه التشارجر غيرت رايي في الأمريكي بس لحد الحين مو متأكد … خل نشوف شنو ممكن يصير السيارة وسيعة من داخل و شكله مقبول من برة و ألوانها عجيبة 
حتى تكييفها أداءه كان روعة اليوم الصبح. عيبها ان مراياتها صغيرة نسبيا و انا ليلحين مو متعود على مقاساتها. طبعا بما اني انا احب ادوس فـ الكل يدري شلون مكينة التشارجر ممتعة.
